貨車司機鬼故事


德哥係一位客貨車司機，每日嘅工作就接收總台嘅order，又或者熟客嘅電召。德哥呢行好自由，只要你肯接，任何時候都可以係工作時間，同樣，想休息嘅時候，將order轉俾其他行家就無問題。

德哥從來無諗過自己呢行會遇到咩神怪事，但有一件事，每次諗起都令佢毛骨悚然。

有一晚，其中一個熟客劉先生打俾德哥，想佢幫手車一轉由北角去淺水灣，由於係熟客，加上又自動加五百蚊，德哥當然樂意走多轉，出門前仲問老婆想食乜嘢宵夜。

德哥去到約定收貨的地點，就喺殯儀館附近，劉先生已經企喺街度等緊佢。要運嘅其實係兩個行李箱，劉先生交代好地址後，因為要趕住處理妹妹間屋，所以唔打算跟車。德哥眼見「有錢佬地址」，正想問無人跟車得唔得嘅時候，見到原來已經有個女仔坐咗喺車入面，當堂無咁驚，起碼有咩事個女仔都可以幫手解圍。德哥好正常問吓個女仔知唔點去目的地，但個女仔一直都只係dup低頭，一句聲都唔出。由於係熟客嘅朋友，德哥唯有自己睇睇地圖，專心（才查）車，費事得失客人。

德哥架車駛去目的地嘅時候，奇怪嘅事開始出現。車廂嘅溫度越來越底，起初以為冷氣教得太低，於是就將溫度定返高啲，不過，架車去到大潭道嘅時候，德哥真係頂唔順，佢唔止凍到手震，仲見到自己把口吐出嚟嘅暖氣，眼見冷氣壞到咁，德哥就熄咗個冷氣，正想同後面位小姐講聲唔好意思，因為冷氣壞咗，覺得熱嘅就開窗嘅時候，倒後鏡入面竟然見唔到個女仔，「唔係咁邪下話！」德哥心中暗叫不妙，內心正掙扎好唔好擰轉頭望清楚嘅時候，佢感覺到背後不斷有一股寒氣湧過嚟，車窗吹入嚟嘅風，同背後湧過嚟嘅寒氣對比實在大強，德哥估計個女仔九成「唔係人」。而個女仔又好似知道德哥諗緊咩嘢咁，一股寒氣貼近耳仔，傳嚟一把女人聲話「我...想...返屋企..」。

大潭道同淺水灣道都係路窄多灣嘅山路，即使德哥驚到個心跳到就嚟爆炸，佢都係咁提醒自己要專心駕駛。好不容易捱到去目的地，德哥即刻跳落車搵大門保安，因為劉先生事先已向保安表示會有人送貨嚟。保安問咗德哥送去邊一戶之後就叫佢等等，離開車廂，德哥先夠膽望返去車入面，

佢更係想車入面一個人都無，咁佢就可以同自己講係自己睇錯，根本一開始就無人跟車。但車入面依然有個女仔坐喺度，而個女仔依然係dup低頭，郁都唔郁。

呢個時候，有三個人由大廈嘅大堂行出嚟，係一對年老嘅夫妻同一個外藉女傭。德哥估係收貨嘅人，於是行返去架車嘅車尾，一邊拎兩個行李箱落嚟，一邊喃喃自語「返到屋企就好落車啦吓，唔該。」講完之後，嗰把女聲竟然回應一句「多謝你」，嚇到德哥全身「毛管棟」。三人行到行李箱面前，老婦一見到兩個行李箱就即刻喊咗出嚟，而老伯就一邊道謝一邊將一封利是塞到德哥手上，之後就叫傭人同自己一人拉走一個行李箱。

因為劉先生已經預先俾咗車費，德哥一時間嚟唔切返應，到佢抬頭望返嗰三個人嘅時候，竟然見到行李箱上面坐住咗嗰個dup低頭嘅女仔，見到個女仔向佢揮手道別，德哥下意識笑咗出嚟，但其實佢仲係驚到個心係咁跳。

坐上司機位，德哥咩都唔理即刻駛返屋企。至於個女仔係咩人，佢背後有咩故事，德哥就真係唔清楚啦。