俾人入完,就足住啲癈柴呻。
呻咩吖!鬼叫你有位俾人入咩!一味話人地點樣點樣,又唔諗吓點樣可以唔俾呢啲事發生。

啲癈柴更話你啱架啦!唔通同你講真話咩！
仲要大大聲話"我地係經紀嚟架!"。即係點？即係人地間間行都星期二入數，你又星期二入數？點解唔行多一步？係唔係「就退休」所以咩都唔理。你旨意下面o個班廢柴！問心啦！佢地夠膽o係你面前俾意見咩！一個二個都無"賓周" o既！

無事就話係銀行,有事就認經紀!一班要做埋報價、入信同客戶服務嘅經紀?你咪笑大我個囗啦!

唉...

五千億,一日利息就差不多有四千萬。
俾我都唔會咁早退錢啦!要怪嘅,就只有怪我地喜逸惡勞,假如真係要星期五晚至收到錢,星期六都叫做有一日時間做嘢。

點解唔早啲同銀行反映,叫佢地幫手睇吓星期六入唔入到錢俾啲客。如果可以嘅,咪快手手搞掂佢lor。但如果銀行都話做唔到,到啲客要嘈時,我地都可以解釋得"理直氣壯"。

個個都大安旨意,"星期六唔係工作曰"。好似呢句說話就係擋箭牌。又唔諗吓今次嘅退款有幾大,人數有幾多。如果今次做得好,傳出去嘅囗碑,好過你賣三個月廣告。

一句到尾,根本就係做嘢唔上心,有位俾人入,係活該!

請用「水平」思考

想不到銀行會推出gift card 。

其實呢樣產品巿面未有太多同類產品,可以做到唔錯嘅成績。至少樓宇按揭嘅現金回增可以考慮呢個形式。又可以代替"百佳現金券"。成為我地特有嘅"禮品"。

重要嘅係,呢種咭要一開始就要有錢,試問又有幾多人咁「神心」,又申請又入錢吖!搵個理由俾咗張咭佢,至少佢有機會可以張咭。再講，有張好似八達通咁o既信用咭，又方便，又唔怕自己「使大o左」。用o黎網上購物就夠安全啦！

更加要喺大學做推廣,因為有興趣用呢種咭嘅人,財務智慧都唔會差得去邊,係有質素嘅客戶,當然要馬上吸納。因為呢班人大多數都有興趣用其他個人理財服務，對日後o既「交叉銷售」會有幫助。

唔用只當呢張咭係一張禮物咭！佢有好多可能性，唔好咁浪費。到其他銀行都有呢種產品o既時候，人地一定會咁用，你到時先諗，已經輸了時間！

識得用，其實好好用o架！！

哭？笑？

管理大師說,一個失敗的危機管理有五個步驟:
一)否認--internet 有事咩!多盤之嘛!
二)欺瞞--得架啦!整緊啦!
三)推卸--唔關我地事,infocast 嗰邊有事
四)找人"祭旗"--sorry,只要你係乖宝宝,公司又點會鬧你吖!
五)事過境遷--咩事都無發生過,下次點算?下次至算!

除了第四項,每次有事都會出現所有步驟!yeah!

你有從電影中學到什麼嗎？

你有看過"海神號"嗎?

當船翻了後,有一班人相信船身沒有問題,可以支撐到所有人獲救。
但另外又有幾個人,認為應該盡快去找出口,因為留在船倉內,仍有一定危險。

我覺得,「選擇」沒有對錯。但每個人都有責任去為自己的選擇付出代價。選了留下,即使船沉了,也請不要怨天尤人。
選擇去找出口的,假如途中意外死掉,也沒什麼遺憾。最少,我也為自己的生命作出掙扎。

我想，我是老派.........

"追求卓越,挑戰120%自己" 從來不是我杯茶。

但我相信 "自己的事自己做,還要幫助做家務" 這些「傳統價值」。

可惜，世界在變,我發現而家啲人做嘢係咁嘅
"你嘅即你嘅,阿公嘅唔係我係我嘅,我嘅你要同我做埋"
可以咁嘅?但竟然無人覺得有問題。
可能喺佢地眼中,呢啲根本唔係問題,有問題嘅,可能係我....

我的預計

全世界都話唔夠分,一定炒到3.5樓上。會嗎?別忘記,還有八成人手上有一千股,真的會有人用高價去買這些散貨?送錢給散戶?我也信會見3.5,但不會是長時間,之後大戶應該會喺3至3.3之間收集。收夠貨,至就會炒到上五蚊。

四百萬不是大問題！

李麗珊話，養一個小孩要四百萬。攪到個個都唔生仔。因為唔係個個都有四百萬。
但都有人因為喜歡小孩，生到兩個、三個。

我喜歡小孩，但我不會生(應該係我唔想令到人地生 :p)
原因不是四百萬，我從不相信廣告的鬼話！而是，這個世界太可怕。連我自己都不喜歡這個世界，我為什麼又要把我的下一代帶來這裡？

生小孩的人，常說不生小孩的人太計算。又說什麼小孩給你的快樂，是金錢買不到的。

但我想說，現在地球人口超過 60億，各國都不斷去爭奪資源，早晚也會發生世界大戰。每生一個小孩，也會為地球帶來負擔(你有看過 An Inconvenient Truth 這套電影嗎？)。再說近一點，看看現在街上的小孩是什麼模樣，你放心把你的將來交到他們手上嗎？你放心把你的孩子放在這些"怪物"埋中去接受教育嗎？

作為一個負責任的父母，絕對不會說出「天生天養」這種論據。承認吧！這四個字都只是你用來自欺欺人的借口。更不要跟我說，「如果個個人都左計右計，人類就會好似恐龍咁絕種o架啦！」假如人類真的能從地球上消失，我一定會為地球慶祝！！

五千？八千都得呀！

今次真係破記錄，有成五千幾個 eipo。
但其實我地o係開市時間做少o左好多盤，狂被人投訴。其實係做一單，賠 一單。

我覺得，如果可以由分行去接部份想 eipo o既客，由分行收集曬所有客o既資料，再由分行經理簽名確認。再將個 list 俾我地，我地做o既只係入返電腦，唔使再打俾個客"確認"。只要可以咁做，我地就可以o係開市時間以外o既時候去入機(入到夜晚10:00都得呀！)。又可以做到 eipo，又可以保持原有落盤o既"生產力"。可以將我地o既生產力去到最大。

不過，無人會咁做o架啦！原因係，「唔會再有咁大型o既招股o架啦，使咩做咁多！」
就係呢一種心態，我地要成為最多人用o既銀行，仲要多五十年................可能更多........~_~"

丹尼斯 vs 丹尼斯

一個eipo嘅小插曲,正當我地喺朝早落緊eipo嘅時候,突然所有資料都出唔到,原來因為負責嘅同事請假,另一位同事又"習慣遲返,原本應該喺開市前做嘅電腦update 要喺我地工作嘅時間進行。攪到我地做唔到嘢。
當然有人扯火啦!打入去問做咩要喺我地做嘢嘅時候去update 。得到嘅回應係"咁個電腦要update吖嘛!做唔到eipo之嘛!"就憑對方嘅說話,就知道對方用緊咩心態返工。呢條友,後生遙遙,就已經成為二等職員--等放工,等退休。對工作完全唔上心,唉!同啲咁嘅人做同事,真係映衰自己。話到尾我都係一個一等人--等炒 :p

其實我o既願望係好卑微，我只想得到「應有」的支援，去令我可以全心咁為公司搏殺。但往往就係因為我地要做太多不必要(只少不必要係我地去做) o既後援工作，令到我地綁手綁腳.......

得到「應有的支援」，這個要求是過份嗎？
但更過份的是，沒有人覺得他有錯。該人的上司竟說，「咁電腦係要 update o架嘛！」
我想話，個重點係-------佢係o係開市時間做 update，而佢咁做係影響到我地o架嘛！！~_~"

我想這是新世紀的行政管理

我從來沒有想過，一個團隊領袖可以o係佢o既隊員面前講，「我返工只係為o左月尾o個份人工。唔該公司叫你地做咩都唔好咁多聲氣。」
:o 我聽到真係:o o左出o黎！因為係句說話o既意思即係「我好廢o架咋，你地唔使指意我會保你地。」
我欣賞o既車路士領隊 - 摩連奴，當佢指派泰利成為隊長時，曾經同佢講過，「你一定要為你的隊友向我提出反對意見，即使這些意見有多無理，你也要為他們出頭。你不能因為害怕而拒絕，因為你是他們的隊長。」我真係感動到喊出o黎！我好想成為車路士o既一份子！！

我同意人係有軟弱o既時候，但當你軟弱o既時候，唔該你返屋企攬住你老婆大聲喊。唔好o係你 d 下屬面前講「我都係打份工o架咋！」呢 d 悔氣說話。不但幫唔到件事，而且o係打擊同事間o既士氣同時，你同樣輸o左你o既威信。一句三輸o既說話，你講o黎把鬼咩！

但最好笑o既係，你同我地講「你都係打份工」，但又要我地有「團體精神」，盡快攪掂 d "蘇州屎"。哈！你最叻o個句都係「有咩事唔該你入去同 p 先生講！」你只會企o係權力o個邊o黎打壓我地，我又唔明你有咩威信去令我地信服呢？

可能我讀得書少，呢 d 新世紀o既行政管理，我真係完全唔識。

呆了

南京上空出現的UFO

http://61.151.243.139/music/2006.wmv

性感就應該俾人非禮！？你個腦裝屎o架！

睇見周刊封面，張張相都喊到豬頭咁。竟然會有人話，
「真唔真呀！開心都o黎唔切啦！又做幾日封面喎！」
「平時都發姣o架啦，咪又係靠男人上位，搵老細！」

我聽到真係把火。
即係話，如果有個妓女，佢放工返屋企時俾人捉o左入後樓梯強姦，佢去報警就唔o岩。因為佢係妓女，應該俾人 x！
女仔著得性感 d ，就預o左俾人抽水？你地當所有性感o既女士都係妓女，因為你無當過自己係男人。你只係覺得自己係一個嫖客，見到所有女人只會想到性慾。你知唔知你好可悲？

一個藝人選擇性感路線，只係想用一種方法去吸引你o既注意力，等多 d 人喜歡佢。佢無義務滿足你o既性幻想。
唔該你地呢班平時對住電腦睇四仔打飛機o既電車男攪清楚！

呢個咩o野世界！ d 人可以咁樣思考？痴撚線！

政治不是請客食飯，辦公室政治都係！

之前有人神神秘秘咁叫我去食飯。如果係無謂o既飯，我多數都唔會去，而且佢地都知道。但今次見佢地攪到咁神秘，問極又唔講。我都係人o黎o架！有好奇心o架嘛！咁咪去 lor！

點知坐低先知道係 L 請o既。已經無咩胃口，再知道係佢請，直頭無心機。由於當晚在坐o既人數組合有 d 奇怪，於是我就問人點解 L 會請食飯，R 話，佢見之前大家做得咁辛苦，咪請大家食餐飯 lor。

呵呵，我聽完真係想笑出o黎。因為當晚在坐o既全都係舊同袍，一個新人都無。喂！人地都係同我地同一個部門o架！點解唔請佢地先？連一個辭o左職o既係都請，點解另外o個 9 個你唔請先？明明係一件好開心o既事，但我地唔可以俾人知。你其實知唔知自己好 on 9 ？

大人做大事，你係想慰勞一班做得咁辛苦o既同事，一係就大大方方請曬成個部門o既人食晚，一係就簡簡單單請大家食個"滿記糖水"，至少係一個光明磊落o既方法。但絕對不能好似而家咁，大細超。咁即係點呀！新人唔係人呀？無資格食你o既飯呀？

唔該你啦！個人蠢就唔好學人攪咁多o野啦！我地部門其實好脆弱o架咋！求o下你唔好再加多一腳攪分化啦！收買人心唔係咁o架！

逃亡潮可能出現了

阿s 做埋呢個月就唔做 lu，我地公司職員流失率之大，過去十年，我已經十分清楚。

但佢今離開，令大家都思考同一個問題，「我仲應唔應該留o係度」。根據我觀察所得，至少有兩三個人都想跳槽。都好o既，留o係度做咩o丫！而且我都無留人o既理由，唔通話，「你地唔好走啦！呢度幾好o丫。賺大錢唔會同你分，除o左落盤，仲要報價、解答問題、入信同落街拎招股書。算係咁啦！」我諗我講完呢句說話，想走o既人會更多！

唯一o既好處就係，每當呢間公司出現逃亡潮，人手短缺時，就係大市升到"吧吧聲"o既時間，到時我又可以叫人放心買股票！:p
我相信，歷史係唔會講大話o既！！

係意志？定係預知？

昨晚係中秋，可惜要返學......都未算最慘，仲要作病！唉！真係玩死人！

朝早起身，已經睇到個喉嚨有 d 紅腫，心諗，無事o既，聽唔到電話，咪反去摺信 lor。月頭呀！要趕寄月結單o架！

一返到公司，俾個「殺人空調」焗一焗，個人即刻暈暈地。之後不停報價，已經令我完全失聲.........到下午，個「殺人空調」竟然出"寒氣"！先焗後冷，令我即時"謝皮"..........

之後放工返學先精彩，見自己病病地，就打算上堂前食個飯，等自己有足夠o既營養去"打仗"。上課時，阿 sir話今晚上到 8:30 就放學，等大家可以早 d 去做節。我心諗，都係捱兩個鐘，應該得o既。點知越坐越唔對路，胃反反，知道自己一定會嘔，去廁所又嘔唔出。心知等到 8:30，我一定會o係回家途中出事。只有提早離開。由炮台山坐的士返慈雲山，係一件好貴o既事，雖然我係病，但都唔想咁浪費，只有坐 mtr 過返九龍先搭的士。o個程地鐵就精彩 lor！一有位就要要坐，好似就死咁。仲要同自己講，唔好o係地鐵嘔呀！頂到返屋企先呀！

去到觀塘，已經要跳落車轉的士。我原本想捱到去彩虹至落車o架！但真係頂唔順。上到的士，又係一輪搏鬥。「唔好o係人地o架車度嘔呀！」死忍爛忍，一返到屋企，即刻去廁所嘔到七個一皮！

都唔知係我意志力大，可以頂到返屋企先嘔。定係計算準確，如果堅持捱到 8:30至走，如果堅持彩虹落車..........
真係唔敢想像！ o_o"