港女買電腦

前兩日細佬有單嘢，十分有趣又有啓發性，一定要分享吓：有日收到個call，原來係前度女友W打嚟，佢求救話想買部手提電腦，但係家陣又netbook又notebook，咁多款唔知點揀，想揾我陪佢買，本來我都想推，但男人衰心軟，又鍾意認吓叻，見佢又咁急住用，咪根據W所定嘅budget，去research定啲牌子同model囉，諗住去到高登快快趣就買完閃嘛！
男人買嘢，多數就做定功課，去到格吓價，就扑槌決定啦！於是我就選定咗某牌子嘅netbook，白雪雪10吋mon，5、6個鐘頭電量，上落三千銀左右，仲搵定多兩個型號俾W比較吓。點知去到高登，W就話netbook個mon細，驚cpu功能弱，無問題，我知道notebook至係佢真正需要，於是轉攻揀notebook！
揀咗一陣，我問吓有乜嘢牌子鍾意，W話無乜所謂，只要唔好係某台灣牌子就得，我唔明，以為人哋有咩技術上缺點，一問之下，先知原來個諧音因為似「笨Q」，我當堂死咗！我唔同佢拗，話晒係前度，一來知性格，二來俾吓面，我決定繼續努力下去，完成任務走人，鬼叫我大安旨意，打算用一粒鐘完事咩，下一場約咗人嘛！
W揀notebook一拎就嫌重，我都好耐心咁分析，要機動力强就要放棄功能，要大mon就要預咗會重，佢明明哋，於是鎖定12吋mon，唔要有光碟機。太好嘞！用咗大半粒鐘，終於縮細咗範圍，我以為有運行，麻煩啲sales哥哥推薦吓，有部似樣嘅真命天子出現咗！誰不知，W一拎依然覺得重，佢一，見到一排雪白色嘅netbook，竟然返轉頭考慮，話同事嗰部就好似呢啲咁，又輕又樣靚！不過佢又擔心開多兩個程式又會慢，睇得耐又驚對眼會攰，左右為難。
我預咗，真係預咗會咁！我又唔係第一日識佢，而且女人不嬲買衫都三心兩意啦！有乜出奇啫？其實W已經盡量理解我嘅分析，我仲好直接咁用比喻：買手提電腦就好似揀老公，要清楚自己首要要求係乜？靚仔未必專一，老實可能會悶；小男人易控制，大男人又安心，有錢有面愛你又專一嗰啲會有，但係嫁入豪門嘅代價唔係個個俾得起。總之一句，每部手提電腦都同男人一樣，各有缺點，問題只係响能力之內，揾「最大公約數」，呢個世界，「電腦無十全，西瓜無滾圓」。
但係故事仲未完結……

上回講到，W十五十六，唔知買netbook定notebook好，佢聽完「揀老公理論」之後，似有啲醒悟，再鎖定notebook先係真正需要，於是睇中咗H記一部，無論功能、屏幕、顏色、價錢、同重量，都符合要求，我諗住仲唔搞掂？點知原來W想免息分期，咁係人都知，會比現金或者直接碌卡貴幾個巴仙，於是乎女人又覺唔抵嘞！
我本著送佛送到西嘅精神，介紹佢去容祖兒做代言人嗰間買，去到MK店，嗰位哥仔好好人，服務周到，分期仲唔使加charge添，咁仲唔掂？果然不出所料，W話想打個電話再問吓同事意見，因為某啲公司軟件可能撞Vista，咁又等多一陣，點知嗰條同事聽見H記型號，就話部機會好熱，我知道因為係用A記CPU嘛，咁至會平啲嘛，怕熱又想點呢？
無問題！唔想熱之嘛，小事一樁啦！細佬立刻帶佢去旺電，根據嗰條同事介紹，搵到台灣A記新出，低功耗CPU電量12粒鐘嘅正嘢，兩部一比，梗係呢部涼快好多啦！正！又解決咗熱量問題，好開心，助人為快樂之本吖嘛！
但係我見到W皺住眉頭，住啲keyboard，有口難言，原來佢唔多鍾意啲掣喎。吓？輪到玩keyboard？唔係吖？似Apple一粒粒獨立黑色，有乜唔妥？其實使乜問，女人覺得唔妥，就係唔妥，係無得解。勢估唔到，最後死响粒掣手上，我兩個幾鐘嘅苦心，咪白白浪費？唔得！我要同佢權衡利害，唔可以為咗一排掣，放棄電腦嘅內涵！
經過我好仔細分析，同售貨哥哥嘅游說，W終於接受到啲掣，大功告成了！但係，佢竟然同我講，想等男朋友放工嚟碌卡同佢買！天呀！咁即係點呀？又話好急住用？揀到最合心水，臨門一腳，又嚟撻Q？我終於無晒氣力，認晒命！無話可說，忍著淚說goodbye。
細佬咁詳細描述呢個故事，目的只有一個，我想扮莊子大師，用一個生活化嘅故事，警惕港男港女，唔好跌入呢種「港女買電腦」嘅擇偶漩渦。如果自己可以付出嘅條件、對對方最重要嘅要求、迫切性、一概唔清晰；再加上人云亦云，身邊朋友多多意見，說三道四，就會氹氹轉，一世搵唔到另一半！枉度光陰。另外，到截稿為止，W仍然未買到手提電腦……死未？