白蛇傳說-國產得嚟又幾好睇

少數想睇嘅國產電影，少數覺得好睇嘅國產電影。

白蛇嘅故事，由細聽到大。但一直以嚟都係用白素貞嘅角度去睇成個故事，包括我在內，大部分人都認為法海大師只係一個多管閒事嘅和尚，人地好地地一對夫妻，無啦啦攪人做乜呢？

幾個月前嘅宣傳，仲用緊《白蛇傳說．法海》呢個名，亦因為呢個名我先會留意呢套戲。今次用法海嘅角度去睇呢一對夫妻，白蛇隱瞞自己嘅身份，認為自己嘅愛，可以彌補對許仙嘅傷害，著眼嘅，係「過程」，但法海就以「結果」去衡量成件事，結論係「你係愛佢嘅，就自己一個流淚，好過佢同你一齊流淚。」法海唔明嘅係，偉大嘅愛情故事，結局無論是悲是喜，都係兩個人一齊流淚。

可能原著嘅人物太少，所以今次搵到唔少人去做「串星」。唔止林雪、楊千嬅，就連張達明都「聲演」法海嘅徒弟，可能同合資片嘅條件有關。徐若瑄演嘅雪女，同李連杰對打嗰幾招又打得幾好睇。不過，法海大師也太操勞啦！雪女係日本妖怪嚟㗎！

特技太多，反而影響到成套戲，好在去到尾段已收斂。同徐若瑄嗰場雪山戲，已經同自己講「唔好同荷里活比較」，但杭州的湖泊有竟然有珊瑚，就真係令我笑了，再見到白蛇青蛇嘅造型，李連杰喺火山入面可以全身而退，只能嘆一句，「大佬你想點？」。去到尾段，少一點"原創"反而睇得舒服，起碼去到水漫金山，雖然有一幕係跟足《2012》，但出嚟個效果又唔差喎。慶幸嘅係，尾段嘅劇情無受到「為特技而特技」影響，竟然感動到我！

其實個故事跳得都幾快，好多情節都只用幾句對白就交代完，對我地呢啲由細睇到大嘅更知咩事啦，但拎去外地嘅電影節參展，人地跟唔跟到個故仔㗎？