工作雜記

9888 呢條線，可以話係萬能。功能包括:
1) 問價
2) 查數 ($)
3) 查倉
4) eipo
5) 問網上報價/買賣操作
6) 一般查詢
7) 搵其他部門o既同事

好難明白公司一面要我地做多 d 生意，一面又要求我地聽 9888 o既來電，一日得 4 個小時開市，我只知我用了 80%時間去處理以上 7項工作。落盤？都有o既，但你唔好要求我有 5,6張盤紙 lor！
其實以上7項工作，都唔一定要有牌o既人至可以做，我真係唔明，點解唔叫其他部門o既同事去做o黎 d 事，搵兩個去聽都好o丫！

eipo 收$80，黃表收$50。eipo o既行政工作比較少，黃表收返o黎我地仲要花時間去處理。理論上，我地黃表花o既成本比 eipo 多，但收費就較少。我真係唔明收費準則係點定出o黎！再者，呢個收費根本吸引唔到人轉用 eipo。記住，我地o既客大部份都係「貪小失大」o既羊牯。輸$30000佢地覺得無問題，但收多佢地 $30，就好似同佢地分身家咁，呢 d 人係傻o架！

或者真係新人有新o既待遇。我地以前，午飯時間邊有人敢(目訓) o架！連落街行o下都要講低比上級知o架！但而家，個個(目訓)得光明正大，叫醒佢地去做o野，好似係你唔o岩咁！嘩！而家入職o既人原來有呢 d 優待o架？試o下我(目訓)o丫，肯定被人篤死未天光！所以我一直話，呢幾個高級職員，o係我眼中，只係「廢柴同盟」。我唔敢話自己優秀。但至少，我唔會12點半一收市就去買飯/叮飯，食到1點就(才羅) 個枕頭出o黎(目訓)，人地叫你做o野仲話返人地轉頭。我只會做完手上o既工作至會休息，可惜因為手快腳快，成日被人見到休息o個 part，做o野o個part 就無人知。以為我好懶咁！唉，都係學o下人地點樣 dum 波鐘。提升公司效率？呢樣o野，得幾丁友做係唔會成功o架喎！！！