只能走兩極

上o個一兩個星期 L 先話「mr. pau 叫大家六月盡量唔好放假。」講話時之神態，語氣之興奮，令所有人收到一個信息 --- 六月不能放假。之後大家又要將 6月o既假調去 7月放，仲要話呢個係公司o既特別安排，皇恩浩盪。因為我放假係為睇世界杯，而家 6月唔放得，7月放返都無咩意義。所以我就無調假，仲走去撕毀o左先前交o左o既放假紙，都知道 d 假一定會被無o左，算啦！我對呢間公司都無咩留戀，準時出糧我就已經好滿意。其他o既o野，佢欠我，好過我欠佢。其他人就乖乖地走去調假，咁咪一樣！只不過係由6月無o既人，改做 7月無之嘛！ /_
誰知今日，H 走o黎問我，5月 plan o既假，可唔可以放少 d，因為中銀招股，要留返多 d 人手做o野。頂你個肺！我 6月已經無假放，你而家仲要打我 5月o個 d 假o既主意。士可殺，不可辱。咪同佢講，「我 6月已經無假放，你而家仲要我 5月放少 d？唔得喎！」之後 H 就走去同 L 吱吱o尋o尋。L 又走o黎同我講，「你 6月 d假無調到，放得o架喎。」

我以為自己聽錯，問多一次，「唔係喎！你上個星期話，因為 6月有人落分行，唔可以放假，要將 6月o既假改去 7月喎！」

L 話，「但你無改到O丫嘛，咁你 6月咪放得 lor。」

嘩，真係一時一樣得緊要，完全唔知你想點。早兩日仲走o黎問我，「你6月 d 假想調去幾時？」我當時已經好明確咁表示，6月唔放得o既話，我就會由得 d 假被你 cut，因為我唔想同其他人爭 7月 d 假。(我從來都唔鍾意同人爭。) L 當時聽完我講之後就唔出聲。我心諗，我而家唔放假啦！唔會令你「難做」啦！

如果我 6月係可以放o既話，點解佢唔即時話我知，好明顯係扮傻，由得我 d 假被人 cut。跟住呢 d 上司，只能怪自己時運低。

哈哈，而家要同我討價還價，就話我 6月o既假可以放，好，無問題。既然 6月又可以放返，咁方便人地，方便自己，我就同意 5月放少日假，返公司做o野。

呢件事，令我知道，o係呢間公司做事，每件事都要做到好絕，迫自己對呢間公司無任何期望，咁你至可以活得自在。

你行「中庸」，人家當你「附庸」。不斷搵你笨。呢個世，無o左「半斤八兩」好耐啦！