旅程總結

最後一日返香港之前都仲有行程，去田崎珍珠同埋 outlet。
好幸運，抽到粒珍珠。呵呵
去埋 outlet ，午餐自費之後就上飛機，不過我隻腳已經好辛苦。
成個旅程雖然有三晚溫泉但我都唔敢浸，
因為出發之前已經有"病發" O既先兆。我唔想再加深佢。
但都難逃病發，仲兩隻腳都腫脹。又唔想掃我自己O既興，所以打算返香港先攪。
但上機O個日就知唔對路，隻腳腫到豬蹄咁，返到香港，第二日就即刻請假睇醫生。
出發前又咳O左成個星期，之後又到濕疹，今年真係多災多難！


日本真係一個好地方，城市固然有佢O既魅力。即使鄉間地方，佢地都根據前人O既傳統加上自己O既改進，令"老餅"都可以與時並進。
人地之所以有能力成為先進大國，唔止因為有錢，仲要有腦，同對新事物O既包容。
山崎、豐田同日清O既創辦人，如果當初佢身邊O既人唔包容佢地，佢地無對「進步」O既執著。又點可以成為大企業？
日本對教育O既支持，同鼓勵國民追求知識。
由明治維新開始，一直到今日，目的之有一個 -- 提升國民質素

唔該 D 所謂「發達」O既第三世界國家睇清楚，學英文係唔會提升國民質素。
改善教育唔只係靠口號。當初日本用中國二萬萬兩白銀賠款(係當時日本幾年 GDP 總和)，
設譯文館，全民教育。
唔好睇少呢兩樣，
譯文館 - 將全世界O既知識都轉做日文
全民教育 - 令個個日本人都識字
即係話，你識字，就可以接觸到好多知識 (所以我都學日文)
加上大量學生留學海外之後，返到日本就會得到政府重用，
唔係去做私人公司O既"海歸"，
再有全國人民O既精神領袖 -- 天皇
呢個政府點會唔進步？

中國最錯就係當日行共和制，假如由君主立憲開始，令國民保留一個精神領袖。日後O既軍閥割據就唔會咁易出現。樣樣都要一步登天，後果只有一個 --- 跌死自己。