006婚禮攝影師的鬼故事：

世君雖然三十出頭，但已經有十年婚禮攝影師嘅經驗。由最初以兼職形式，到近年跟朋友合資做老闆，見識過不少婚禮上光怪陸離嘅事情，但講靈異事件，估唔到呢個專門同人家「贈慶」嘅婚禮攝影師，都有令人意想不到嘅經歷。

話說世君創業初期，仍然要靠做婚禮統籌嘅家姐轉介一啲生意俾佢地。有一次，世君家姐有個客將婚禮延遲咗半年，咁啱同原先負責嘅攝影師撞期，唯有搵世君臨時頂上。

結婚當日，世君一早就同男家一齊出發去接新娘，之後玩完一輪新郎，就一齊返去男家拜祖先同敬茶。入到男家屋企，世君不停咁搵有利位置去拍攝整個過程，需知道香港居住環境狹窄，要喺一個逼滿人嘅地方影相，其實係一件勞心勞力嘅工作。但影影吓世君發覺有啲奇怪，間屋嘅其中一個角落企咗一個老伯，面無表情，只係眼都唔眨咁睇住一對新人敬茶，對其他人嘅嘻哈玩笑全無反應，而奇怪嘅係，全屋人都無同呢個阿伯講過一句說話。直到所有嘅儀式做完，世君嘅家姐叫佢同拍片嘅同事返去剪輯好相片同影片，等晚宴嗰陣可以俾來賓欣賞。但世君心想，「敬完茶啦咩？個阿伯未飲茶喎！」為怕多口講錯嘢，只好聽家姐講，返去做嘢先。

世君如常喺下午五點前去到婚宴場地，一對新人就好似要開演唱會嘅天王天后一樣，由化妝到換衫都有專人照顧，而呢啲專人，大多數係一對新人嘅親友。世君好喜歡呢個畫面，一班人盡心盡力咁為一對新人，其實就係最大嘅祝福。

夜晚嘅主要工作，其實就係不停咁幫一對新人同來賓影合照，時間好容易就過。到開始入席，世君先有時間休息十零分鐘，呢個時候，世君又見到嗰個喺男家出現嘅阿伯，今次個阿伯企咗喺主家席側邊，世君唔理得咁多，因為螢幕開始播出一對新人嘅成長片段，播完之後就係律師監禮同埋一對新人講個人感受嘅時間。

世君見到個阿伯出現喺新郎嘅成長片段入面，心想，原來真係男家親戚，但睇返啲相，佢同新郎關係應該幾密切，點解成晚無人理佢嘅呢？之後，世君聽到席上嘉賓嘅耳語，原來呢位阿伯，就係新郎嘅父親，不過大半年前癌症復發而離開人世。聽到呢度，世君大約都估到係一個咩嘢故事。直到聽完新郎喺台上發表嘅感受，知道原來新郎嘅父親老來得子，新郎畢業嗰陣，父親已經七十歲，新郎一直希望父親能夠見到自己成家立室，滿以為捱過癌症治療，父親就可以為自己嘅婚禮做證婚人，可惜好景不常，喺婚禮之前，父親嘅癌症復發，最後都唔可以成為新郎嘅證婚人。講到呢度，新郎已經泣不成聲，婚禮主持亦都出嚟打完塲，免得令氣氛變得太傷感。

世君呢個時候望過去嗰阿伯企喺度嘅地方，阿伯仍然係面無表情，不過就望住泣不成聲嘅新郎不停點頭。可能靈體大多數唔會喺臉上表現出情感啦。原來自己撞鬼撞咗成日，世君呆咗咁望住個阿伯，如果唔係拍片嘅同事打咗一下，可能佢已經唔記得自己有工作在身。而同事見佢突然面青口唇白，就以為佢被冷氣吹到病咗，叫佢去飲返杯熱茶。之後婚宴繼續進行，好順利咁結束，世君唯一要克服嘅就係佢嗰對震到停唔到嘅手。

直到一對新人送就哂所有來賓，世君亦都可以執嘢收工。就喺佢同其他同事走嘅時候，新郎走埋嚟同世君講咗一句令佢唔知好嬲定好笑嘅説話，「嚇親你唔好意思，我知我爸爸全日都同我地一齊，因為我都見到佢。」