行山客的鬼故事：

阿森係一個喺紀律部隊工作嘅公務員，平時喜歡同同事去行吓山。對於鬼怪事，阿森雖然未遇過，但身邊同事嘅經歷，令佢不得不信呢個世界有啲嘢係解釋唔到嘅。

夏天嘅時候，阿森喜歡同同事一齊行夜山。呢一晚，阿森成班同事就去行西貢，因為西貢近海，海風吹埋嚟，感覺行得無咁吃力。

一班人邊行邊的傾偈，講講吓就講到喺西貢行山而失蹤嘅人，原來除咗本地人之外，亦有外國遊客喺香港行山嘅時候失蹤。當中最廣為人知嘅就係失踨探員丁利華，一來因為佢本身係警務人員，警察自然會比較著緊。二來網上流傳一段據稱係丁利華打去報案中心嘅對話，令成件事變得撲朔迷離。

之後，阿森成班人嘅話題就圍繞住呢啲古靈精怪事物。當大家講到百花林名墓嘅狐仙嗰陣，有人提到最早有狐仙修練的地方係大嶼山，更話寶蓮寺選址大嶼山，就證明嗰度與別不同。又有人話曾經出現狐仙像嘅溫莎大廈，即係而家嘅皇室堡，嗰隻狐仙就係百花林嘅狐仙。

呢個時候，阿森發現周圍嘅霧越來越濃，而溫度亦越來越低，再行咗一陣，有人覺得好似不斷重複行緊同一段路，有人就凍到頭痛同起雞皮。阿森見唔對路，想用GPS確認位置，但身邊所有電子儀器都運作唔到，而指南針嘅指針就不斷打轉。大家都意識到發生緊咩事。

更嚇人嘅事，而家先出現，樹林入面有一啲類似野獸嘅目光盯住阿森成班人，最初只係一兩對眼，漸漸數量越來越多，濃霧加上夜深，令人睇唔清數十對眼睛到底係咩嘢生物，或者應該問，到底佢地係唔係生物。

出身紀律部隊嘅阿森同佢班同事，就算驚都要頂硬上，阿森就向住樹林大叫，「我地只係行山路過，無心打擾你地，如果有咩得罪，希望你地原諒。」跟住就將用作補充體力嘅水果同麵包放喺地下。做完哂所有嘢之後，樹林入面嘅眼睛開始消失，霧亦開始散去，成班人馬上走出樹林。當佢地離開樹林行返去大路嘅時候，有五個人迎面企咗喺度，一個老伯帶頭，後面跟住一對中年男女同兩個少女，呢五個人全部著住灰色衫，無任何行山裝備，連電筒都無一支。其中一個老經驗嘅同事就叫大家唔好理咁多，行出大路先算。阿森好記得行過呢五個人嗰陣嘅情形，見到佢地手上拎住嘅水果同麵包，個心已經涼咗一半，而佢地身上嘅嗰股氣味，阿森形容比狗房嘅氣味強十倍。

一段十零米嘅山路，阿森感覺好似行咗好耐好耐。到成班人走哂出樹林之後，阿森見其中一個同事驚到坐咗喺路邊喊咗出嚟，到佢情緒平伏返之後，大家就問佢發生咩事，原來佢行過嗰五個人嘅時候，個中年女人好惡咁喺佢耳邊講咗一句「我地唔係妖！」大家都唔明，點解淨係同佢講呢？有心水清嘅人就記起，大家一直都係用「狐仙」去尊稱佢地，就只有佢一直叫佢地做「狐妖」可能係咁激嬲咗佢地。而呢個人之後亦患咗啲莫名其妙嘅皮膚病，一直都無法根治。

最後我問阿森，「你真係信嗰五個係狐仙？」阿森就話，「可能啦！不過如果佢地真係狐仙，咁嗰兩個女仔又無我想像中咁靚。」