有點哀愁的年廿八

年廿八是放假前最後一個工作日。原本以為沒有花紅，但昨天突然又說有。大約是月薪的 40%。比起其大銀行，我感到有點失望。但總好過沒有花紅。

可能阿 may 已經兩年無花紅，所以就走去同阿包問點解。點知個賤人同阿 may 吵大鑊。仲炒埋阿may。全公司都好愕然，其實阿may都無咩o野，只不過係阿包唔 like 佢。所以有心唔出花紅俾佢。仲要人地即日離開公司。又同其他人講，唔好好做o野就炒埋其他人。如果係照工作表現，只少唔會得佢一個無花紅。阿包太賤，又小氣，我懷疑佢係唔係男人。

呢間公司，如果一日仲有佢o係度，我地都唔會有好日子過。我只想兩年後考到個 cfp，咁就可以離開呢間「怪獸公司」。

不能變身的矇面超人

收到一個意外消息，令我覺得，人o既能力真係有限。好多o野唔係你想點就點，有好多原因令你動彈不得。「能力越大，責任越大」真的嗎？為什麼我能力沒有大，但責任卻越來越多。好吃力！別的人，像我這個年紀，只需要考慮自己的事。家中事，無論大小都有一家之主--老爸去處理。但我卻要扛起這個擔子..........

可能受呢件事影響，令我發o左個怪夢。夢中我同"吳唱k"戰鬥，(可能我十十十十分討厭呢個人，所以用o左佢做投射) 打打o下，佢變身打到我 7 個一皮，我都唔執輸，馬上變身，但奇就奇在，我變唔到身。但我繼續同佢打，打到跌低，即刻起身又打過。無想過逃跑，無想過認輸。

我諗呢個夢，已經教識o左我點做啦！

22-01-2006

我習慣平穩o既事我唔會講，因為講都無用。但我發現你今年真係...好平淡。
今年唔會有咩大起大跌。但平平穩穩都唔差，平安是福嘛。處理任何事你都可以用「公平」同「正直」o既心態去處理。亦都因為呢個原因，令到你o既人際關係唔會差得去邊。
財運同健康都無咩問題，即係話唔會有好大筆錢到手，但夠使夠食。健康都唔差，當然，唔可以因為健康運好就唔愛惜身體。
工作上會出現「懶散」o既心態。我都明，o係呢間公司，勤唔勤力都係一樣。好易令人懶散。但時刻都要警惕自己，要糾正呢種心態。
因為戀愛運係一個比較私人o既問題 (只少我唔知你o既情況:p)。但我照占卜講啦！要忍耐，不要急進。反正「欲速則不達」。而且，你現在o既忍耐，係會為你將來帶來幸福。
(因為無咩信心，所以唔知準唔準....)
留心，雖然今年好似平平無奇。但人就係咁怪，對太平靜o既生活會感到悶。呢種悶仲有可能成為一種孤獨感。咁就要小心啦，因為孤獨會為你帶來一 d 「意外」(即意料之外)事件。

p.s. 香子小姐，這個占卜不是你的 :p

焗住出貨.....~_~

報紙日日都講幾多公司有花紅，幾多公司有人工加。真係唔好咁大聲！至少我公司今年應該唔會有花紅。早幾日開會，有廢柴同我地講一大埋廢話，意思只有一個-「今年可能無花紅。」仲叫我地唔好用「無花紅」呢樣o野o黎講笑，話怕俾「腦細」聽到會有反效果。好一個管理層，夠膽講 d 咁o野，你只顧上面o既感受，又有無理過我地o既感受呢？既然知道可能無花紅，你更加要安撫大家o既情緒，穩定軍心。你一句「唔好講」。其實已經影響o左人地o既心理。我可以好負責任咁講，今年，至少有兩個人會離開公司。

俾條廢柴咁講一講，攪到我要賣o左隻 3383 套返 d 錢返o黎。年尾啦，點都要有個錢o係身。
呢隻係我少數看好o既大陸股票，上市價$3.3，我已經睇 $5。不過唔想搓太耐，覺得過年前都有$4.5，就定下目標，$4.5出o左佢。點知個廢柴話無花紅，我怕無錢過年，(話曬股市有起有跌，無人陪膽保證唔會跌！)死死氣$4.3出o左..........點知第二日佢就爆上 $4.5。~_~" 想死！

情緒高脹的婚宴13-01-2006

其實係我部門阿頭結婚，我一直都唔想去，呢條友，公司其他同事結婚，佢死都唔去，連平時玩開o既同事都唔俾面。再者，我都同佢無咩兩句，去o黎托咩！但阿mi鬧我，話呢 d 人情一定要做足，咁死死氣都要去啦！
逸東酒店，有錢o既真係唔好o係呢間o野擺酒。食物---水準以下。服務----一般啦。
而且我都估到我阿頭唔會闊佬得去邊，但個魚翅真係唔得，有 d 蟹殼碎混o左入去，我差 d 俾 d 蟹殼哽死！x_x 唉！食完真係要過對面廟街補返個煲仔飯，唔係肚空空都幾難(目訓)得著！
加上當晚下聖旨，不能玩新娘！哈哈，睇o黎呢個女人都唔慌好得去邊，大好日子，竟然成晚唔笑。睇o黎呢 d 毫係我阿頭o既報應！呵呵！新郎又成晚避開我地唔飲酒，咁我地唯有當一人夾500蚊成班同事去食餐晚飯。好在，紅酒大量供應！我地o個圍就已經消滅o左5,6支紅酒。哈哈，你地見過有人一坐o係度，一邊講o野，一邊左搖右擺未o丫？我就見識到啦！^o^
frankie 個傻佬，成圍十一個人，佢就去隊 pc。真係未死過！我地就更係即時幫pc啦！o岩o岩肝炎好返都話之你，鬼叫你隊pc咩！都亂咁講o野，攪到pc情緒失控打爛杯 (有圖為證)。最後俾人隊到今日返工遲大到！哈哈！^o^

何志平，講得好！

都市觀微
祭天與祈福香港黃大仙祠85周年紀慶，於上周日首度封祠舉行絕跡中國近百年的「大獻供」祭禮，為港人祭天祈福。我身為民政官，嗇色園便請為主禮嘉賓，撰寫並宣讀《祈天祝文》（見民政局網頁）。卻有評論諷刺我是基督徒就不宜主祭，又訪問某些玄學家，說異教徒祭了也不靈驗。還說封祠妨礙一般信眾進內參拜，門外的香燭檔生意損失慘重之類。這麼多人盡心盡力，恢復古禮，為香港祈福，見者都應該隨喜讚嘆，分享功德，不應冷嘲熱諷。所謂德不厚，則福份薄，我們應該尊重傳統風俗，否則就會折福，尋常百姓如是，認識中國傳統的玄學家更應該如是。我在祭文初段為香港的「風教淪落」而悔罪，是有感而發，絕非無的放矢。開檔做神廟生意的某些人都不敬神，只關心半日的金錢損失，香港人真的窮到這個境地嗎？如果人人都為錢而惶惶恐恐，則果真是還未「精神脫貧」了。當日我在祭文說的「自求多福」，有批評說我未為香港祈福。其實按照中國儒家的祭禮傳統，儒官主祭，是不能鼓吹迷信，妄自求福的，只能為百姓懺悔罪過，修德行以求福報。道壇的祭天文，多是這種寫法。香港金蘭觀在辛巳年的祈天文，一樣為香港人道德淪喪而悔罪修德。直接向上蒼祈福的是道士，宣讀祝文的儒官只是借助祭禮來施行教化而已。我至多只能引周文王說的「永言配命，自求多福」，勉勵百姓，安命修德，我是不能親身向天乞求賜福的。這是儒家與佛道兩教保持距離的政治藝術，也是我為什麼能以官員身份參與，亦不須顧忌我的個人基督信仰的原因，且不說祭天必須要有天子或地方官代表主禮的傳統了。借助神道來施行教化，漢代稱為「神道設教」，我在會刊的祭文後面已有詳述，奈何評者懶惰到連看也不看，檢到丁點問題便破口大罵。假如我們還不學懂尊重風俗，不尊重知識，只識得講錢，只識得罵人，這樣的社會風氣，怎能振興文教？
何志平民政事務局長

(續)香港入境事務處，萬歲 \^o^/

成個換身分證o既過程，我只係用o左十分鐘左右。
香港政府部打o既效率，我夠膽講，
水準係世界一級！！！

香港入境事務處，萬歲！\^o^/

等o左咁耐，終於都到1976&1977年o既人換身分證啦！

上個星期打電話預約今日晚上7:00去換。
就由打電話講起，成個過程係可以用話音進行，即係唔使你行一大輪"電話迷宮"。不過因為我用公司電話，唔方便咁大聲，有 d 資料都要用人篤電話。預約完成。今晚早o左去到，6點十去到，行去拎o左張表去填，個阿姐就叫我睇住電視，等我個號碼出現就可以去影相同打手指模。撞鬼！我都未填完張表，電視就打o左我個號碼出o黎！心諗，「使唔使快到咁呀？」之後對一對 d 資料，scan 我兩隻手指公，影o左兩張相俾我睇o下用邊張放入身分證。其實係可以影好多張，我同事影o左有成十張相。我覺得，影咁多張咪又係你個樣，唔同影多幾張你會變吳彥祖咩！o係兩張相中揀o左張無咁醜o既(本身個人唔係靚仔，費事攪咁多o野啦！)之後，個姐姐叫我等一等，見完主任就走得。等o左幾分鐘，個主任同我對返之前 scan o既資料，問我係唔係返將軍澳拎證，走得。我多口問佢，如果呢段時間咁不幸唔見o左張身分證會點？佢就話要收錢。可能佢以為我想留起張舊證做記念，所以係咁話要錢。我知道有好多市民都有呢個打算。~_~ 其實我真係想知，唔見o左張證，補領有幾麻煩o者~~~~！
http://www.smartid.gov.hk/tc/app/index.html

不予家奴

中國電力大鑼大鼓話用過億元(唔知係 hkd 定 usd 啦)投資為香港供電。
咁就奇啦！國內時時都話唔夠電，你咁多電，唔賣返俾國內人民，走去賣俾一個地球上其中一個電力供應最穩定o既地方！有無攪錯！知唔知咩叫企業良知？國內有電費限制，令你唔能夠賺最多o既錢。唔係一個合理o既理由o黎o架！
因為唔能夠賺最多錢，你就剝奪市民用電o既權利，有無人性o架！我希望只係中國電力同大陸政府角力o既一場戲。目的係要國內放寬電費管制。唔好攪我地香港啦！你玩唔起o架！無錯香港電燈係收得比較貴但人地唔會未清楚你地o既料就買你o既電，中華電力o既穩定供電你地更加有排都追唔上。地下鐵同九廣鐵路係公共服務，你地供電穩定無保證，佢都唔會考慮你。
唔好做臭自己個名啦！話曬你老豆有頭有面。唔好攪咁多o既啦！香港同大陸唔同。我地講法治o架！

06年第一個錯盤

估唔到開o左市得幾日，我已經「破身」！
今日有個阿姑開市前打o黎落盤，一輪咀落 order。成個過程我其實無聽過佢講咩o野。之後問返佢係唔係 $0.067出貨，當時開市前時段係掛緊 bid$0.066 / ask$0.088。咁我見前收市價錢0.076。佢呢隻係 put輪，呢幾日個市都升到baba聲，你無理由掛 8仙幾o瓜！佢應我「唔。」無話我錯o架o下！最後我再成個盤覆佢一次至入電腦，「9733，$0.067出 20萬。係唔係？」佢又係答「唔。」仲無話我錯o架！
點知！個盤做返o黎 $0.07，我一打去覆佢，佢就 bilibala 話自己講 $0.087。聽返錄音佢真係有講。但係我聽唔到嘛！唔係我唔會問你係唔係 $0.067啦！我講錯你又唔出聲，仲要話你自己唔會負責任。我知，你呢 d 咁不負責任o既人，而家香港通街都係，我都無咩感覺。但我只想你明白，唔聽人覆盤係唔o岩o既！因為你會累人不知不覺做錯盤。