變形金剛 2 狂派再起 - 物超所值的垃圾片

作為一套商業電影，我會話「好好睇！」
但如果你係一個喜歡睇"故事"0既觀眾
咁就真係SORRY 啦，呢套戲絕對唔係你杯茶
純粹用故事去評分0既話，呢套屬於「垃圾級別」
剔除所有同機械人有關0既情節
成個故事就係男、女主角0既感情問題
我唔明白，如果自己個女朋友「好有市場」
而自己只需要主動講一句「我愛你」就可以穩住呢段關係
點解會要求女方講呢句說話先呢？
我真係"R"曬頭！

俾0左 $70 入場，都仍然覺得「好好睇」0既原因
係因為呢套戲"算得太盡"
有特技，有打鬥，有追蹤，有攪笑，仲有 「美瑾霍斯」
官能上0既刺激完全令你忘記，其實呢套戲有2小時40分！
一開始0既「上海激戰」到之後0既「柯柏文以一敵三」
仲有「攻擊航空母艦」同「"破壞者"合體」
齋睇呢幾場已經睇到你「嘩嘩聲」
不過最後柯柏復活0個場「大戰」，我就真係"跟唔切"
有D睇到眼花0既感覺，可能真係「年紀大」

「承接」上一集，今集都有意無意宣揚"外星人訊息"
總統代表同柯柏文0既對話，反映出人類0既「領導者」有幾短視到無知
又笑0下0個班「外星人狂熱者」幾咁"葉公好龍"
不停去調查"真相"但當佢地處身"真相"0既時候，郤驚慌失措，要求「置身事外」
今集將外星文明同古文明聯結起0黎，
上集都無講0既
但我覺得個「聯結手法」唔係太靚
三言兩語再加幾幅相就交代成件事，太兒戲啦
"異獸戰"就做得好睇好多
堅持要用呢條橋，我想可能係要向觀眾「灌輸一D概念」

要彈0既係，「沙拉保夫」個樣越來越"樣衰"，咁都有得紅落去，就真係天無眼！
明明係「變形金剛」，高智慧外星機械生命體
又撈埋其他0野
無啦啦又有個「美女機械人」，都唔夾0既
仲有0個隻「索斯機械犬」呢兩隻0野識唔識變形0架！
我最接受唔到0既係，狂派好多機械人都唔多識變形，
因為一出場就死，而且個個"差唔多樣"，
我有時都唔知死0左0個個係博派定狂派
睇死人咩！